Сайын барахсан чыычаах өрө-көтөн тахсыбытыныы түргэн-түргэнник ааһан хаалла. Төрөөбүт түөлбэм Ээйик устун аргыый аайдык хааман иһэбин. Тулам араас саҥа тутууларынан харахпын үөрдэр. Быйылгы сайын хаһааҥҥытааҕар даҕаны таһаарыылаахтык ааста. Ол курдук биһиги нэһилиэкпитигэр элбэх араас ремонт үлэтэ барда. Ону сырдатар сыалтан тэрилтэ салайааччыларын кытары атах тэпсэн олорон ирэ-хоро кэпсэтиэхпин баҕардым. Бастатан туран оскуолаҕа сырыттым. Директоры иитэр-үөрэтэр улэҕэ солбуйааччылыын Оксана Васильевналыын кэпсэттибит.

— Быйыл оскуола5а туох ремонт  улэлэрэ бардылар? Оскуола саҥа үөрэх дьылыгар төһө бэлэмий?

— Үтүө күнүнэн! Быйыл бүтун Россиятааҕы «Доступная среда» программа чэрчитинэн оскуолаҕа киирии лестницата ремоннанна, ону тэҥэ пандус оҥоһулунна. Бары билэргит курдук оскуолабыт олус кэрэ дьүһүннэннэ. Бу үлэни толордулар нэһилиэк биллэр-көстөр мас уустара Степанов Анатолий Потапович уонна Соломонов Андрей Христофорович. Кинилэр улэлэрин үрдүктүк сыаналыыбыт. Бу улэни ис сүрэхтэриттэн үрдүк хаачыстыбалаахтык онорбуттарыгар биһиги махтаныах тустаахпыт. Ону таһынан буоларын курдук күһүн аайы былааннаммыт улэлэр бардылар. Ол курдук оскуола иһинээҕи истиэнэлэрэ кырааскаланнылар, уонна залбыт саҥаттан лаахтанна. Ити курдук бэлэмнэнии үлэтэ барда, оскуолабыт сана үөрэх сылыгар толору бэлэм. Оскуолам аанын сабаммын, нэһилиэгим устунан ситэри хаамабын. Эйик сүрэҕин ортотугар тохтоон нэһилиэк аҕа бдаһылыгар киирэбин. Степанов Иван Петровичтыын кэпсэттибит:

— Сайыҥҥы кэмҥэ нэһилиэкпитигэр туох үлэ-хамнас барда?

— Дорооболоруҥ! Быйыл сайын былаан быһыытынан муниципиальнай дьиэлэр ремоннара бардылар: түннүктэрэ, сарайдара, истиэнэлэрэ.  Ити барыта кыстыкка бэлэмнэнии үлэтэ диэххэ сөп. Ону таһынан кэнчээри ыччаппыт, дьоммут-сэргэбит  суол быраабылатын тутустуннар диэн дорожнай бэлиэлэри туруордубут. Итиэннэ оскуола оҕолорун, үлэһиттэрин көмөлөрһнэн субуотунньук бөҕө буолла. Ол курдук «Мы за чистое село», “Ыраас эбэ” курдук акциялар ыытылыннылар. Итинник тэрилтэлэр бары бииргэ улэлиллэрэ олус хайҕабыллаах суол, “Норуот күүһэ – көмүөл күүһэ” диэн мээнэҕэ эппэттэр. Бу курдук үлэ тиһэҕин быспакка буолара эрэйиллэр. Бу сайын оскуола «Күннээх Эйик» диэн лааҕырыгар биир кун баран оҕолор оҥорбут проектарыгар дьүүллүүр сүбэҕэ үлэлээбитим. Оҕолор олус учугэйдик бизнес-план онорбут этилэр, онтуларын көмүскээн, сөпкө сыаналанан миэстэлэспиттэрэ. Ол проектары ылан, үөрэтэн, эһиилги дьылга ситэ үлэлэһиэхпит. Маны таһынан балыыһаҕа сылдьарга сананным. Эйик ФАП-ын салайааччытыныын Соломонова Екатерина Васильевналыын сэһэргэстибит: — Быйыл сайын ремонт үлэтэ улаханнык барбата, үп суох буолан ремоҥҥа харчы көрүллүбэтэх. Ол иһин пандус эрэ тутуллунна (имбэлиттэргэ кирилиэс). Бэлэмнэнии улэтэ барда. Ол курдук, дьону-сэргэни кытары ирэ-хоро кэпсэтэн үөрэ-көтө дьиэм диэкки хаамтым. Үүнэ-сайда тур, тапталлаах Ээйигим!

Кыстыкка бэлэмнэнии